Arabic Love Poem
- Dcn. Mena Basta
- Apr 21, 2021
- 2 min read
This piece was written originally on April 22, 2021 in Arabic
في حب هواه
قلبي جرا على حب هواه
باع ارضي واشترى سماه
لما قلبي جري وراه
ملقاش غير حبيبي اياه
سايب ارض الخير عشانه
مش شايف غيره قدامه
حاجة غريبة يتسألوا
ازاي اميرة تحب امثاله
اصل دا حبه جوايا نار
خلاني هايمة دايما احتار
مليش غيره حبيبي البار
ناره في قلبي ليل ونهار
بنيت له في قلبي قصر كبير
شرعت اشوفه في ضفة نيل
ياللي قابلته اعملي جميل
قول لحبيبي مالكش مثيل
في حب هواه سهرت ليالي
اكتب واشكيله عن كل الامي
الم عن بعد حبيبي الغالي
واشتياقي اني اشوفه تاني
يا حبيبي بحبك عن بعد وقرب
وبكل ما فيا من عمق الحب
اشتاقلك وافضل عنك اكتب
يا حبيب الروح والعين والقلب
وربي القائم شهدت انك نادر
على بعدك عني مابقتش قادر
شعري زجل وانت خابر
على زيارتك لي مابقتش صابر
حاولت اسكت. دموعي خانت
حاولت ابعد وقلبي ثابت
بقيت لحبك شبه عابد
والرب على كلامي شاهد
سألوني مرة عن حبك ليا
ومشاعري الشبه سماوية
قلتلهم عن شعرك ليا
اللي فيها جمال الأبدية
"الحب هو خالد الوجود
من الأزل حاضر صمود
في طريقه تشرق الورود
وتسخر من أغلى الياقوت
ليس للحب شعور مثيل
جعل على الروؤس اكاليل
في خلود مثل مياه النيل
وشروق نجوم اليل الجميل
شجرة خلد وملك لا يبلى
حبك في قلبي ابدا لا يفنى
نقشت اسمك وانتي ملكة
عل فكري وقلبي يا ربيع الجنة
اصفك كملكة نادرة الجمال
حبك ليس له مثال
جبارة وقلبك مليئ بالحنان
ونور النعمة في حسنك جمال
منك يا نادرة الوجود
عرفت جمال ربي المعبود
وحبه الازلي الغير محدود
له كل مجد وسجود"
شايفين كلامه عني ازاي
قلت لقيت زيه ازاي
هاتوا العود ومعاه الناي
غنوا لحبيبي اللي جاي
عشت ليالي عنه بعيدة
مش هسيبه ولا دقيقة
ولا ثانية تفوتني ماشوفش فيها
عيونه الحلوة ماليا كياني
في غرامه بقيت احتار
نظرة عينه من نور ونار
غامضة وفيها بحر اسرار
وحكيات وحسرة قلب جبار
ايده شايلة الكون بمافيه
حبي له عمره مايكفي
سطور الزجل واغانيه
وهواه اللي عايشة فيه
نسيت كل الجاه والمال
جريت عليه زي الأطفال
في حضنه هبات وفي ظله انام
دايما حاسة براحة البال
دي الحياة حلوة في حضنه
وجمال الدنيا كلها في عينه
بحلم بيه ولا في زيه
حبيب قلبي وروحي في هواه
Comments